Aurkezpena: Sareak ehuntzen

Bilboko Udalak antolatzen duen Bilboko Antzerki eta Dantza Garaikidearen Jaialdia, BAD, 21. ediziora heldu da eta bere merezimenduengatik heldu da arlo horretako zaharrena izatera urian. Hala ere, hamarkada bi igarota gazte dago eta zintzoa da bere nortasunarekin, kalitatezko lanen aldeko apustua eginez, tokiko artistei leku garrantzitsua emanez, antzerriko konpainia esanguratsuak ahaztu barik.

Izan ere, BADek gertuko inguruan sartu eta zabaldu ditu sustraiak eta, horrez gain, atzerrian proiektatu du bere eragina, antzerkiko sorkuntzari eta ekoizpenari laguntzeko proiektu transeuroparrekin lankidetza- sareak sendotuz. Aurten ere, BADek uriko zenbait antzeztoki okupatuko ditu urriaren 17tik 27ra eta 21 konpainiako azken lanak ikusiko ditugu. Bost erabateko estreinaldi izango dira eta ikuskizun batzuk lehen aldiz ikusiko dira Euskadin.

Aukera askotarikoa da (antzerkia, dantza, performancea, bideosorkuntza…), baina sortzaileen etengabeko ikerketa beti dago presente, eta horren ondorioz sortuko dira ikuskizun abangoardistak, harrigarriak eta zirkuitu komertzialenetan ezohikoak direnak.

Ibilbide luzeko konpainien eta artisten azken lanetara hurbiltzeko aukera emango digu jaialdiak, adibidez Igor & Moreno, Belgikako TgSTAN konpainia edo Miguel Pereira portugaldarra; ezinbesteko batzuk, esaterako Agnes Mateus eta Quim Tárrida; eta Euskal Herriko eszenan, erabateko estreinaldi ugari, kasurako Legaleon–T/Kolektibo Monstrenko –BAD jaialdiak koproduzitutako ikuskizuna–, Javier Liñera eta Ekoma Teatro, eta Tripak.

Ondo pasatzeko ordua da, utz diezaiogun BAD jaialdiari beregana erakartzen eta goazen buru ireki eta ernearekin, zeren jaialdi honetako ikuskizunak ikusi eta entzun egiten dira baina ikuslea astintzen dute eta bost zentzumenen bidez harrapatzen dute, eta baliteke antzeztokian gertatzen denaren parte-hartzaile bihurtzea. Ezer ez da dirudiena, ezer ez da erraza, mila aurpegien ikuskizuna hasi egingo da.

Gonzalo Olabarria
Bilboko Udaleko Kultura Saileko zinegotzia

Copyright © 2019 BAD BILBAO

B.A.D Bilbao Antzerkia Dantza - Festival de Teatro actual y Danza Contemporánea de Bilbao
San Frantzisko Udaltegia - Mariaren Bihotza Plaza z/g - 48003 BILBAO