Javier Liñerak eta Ékoma Teatrok “Tendríamos que haber empezado de otra manera” antzezlana eskainiko dute gaur arratsaldean, 20:00etan, Pabellón 6 aretoan. Horrez gain, BADek Igor & Morenoren, Ziomara Hormaetxeren, Benetan Beren, Eguzki Zubia-La Dinamikaren eta Zirkozaurreren ikuskizunak aukeratu ditu.

Bilboko Antzerki eta Dantza Garaikide Jaialdiak – BADek, joan den ostiralean eman zion hasiera 21. edizioari. Aurten jaialdiak finkatuta dauden eta indarra hartzen ari diren euskal artisten eta konpainien presentzia indartu du. Aste osoan, ikus-entzuleek horietako batzuen azken lanak ikusteko aukera izango dute, Javier Liñera eta Ékoma Teatro, Igor & Moreno, Ziomara Hormaetxe, Benetan Be, Eguzki Zubia-La Dinamika eta Zirkozaurre taldeen eskutik.

Gaur goizean, hainbat diziplina lantzen dituzten hiru konpainiak Bilbon egin den laneko gosari batean hartu dute parte, euren lana eta sorkuntza prozesua komunikabideekin konpartitzeko. Javier Liñera, Igor Urzelai eta Moreno Solinas, (Igor & Moreno) eta Zirkozaurreko Gorka Pereira egon dira, Alicia Otxandategi BADeko zuzendariak lagunduta.

Javier Liñera oso ezaguna da euskal eszenan, eta Ékoma Teatrorekin egin duen “Tendríamos que haber empezado de otra manera” azken lanarekin helduko da BADera. Komedia beltz horretan, bi gaixo koittaduk bakean bizitzeko trazatutako plana jarraitu beharko dute, baina ezer ez da pentsatu bezain erraza izango. Ékoma Teatro, areto barruko zein kaleko lanak dituen ibilbide luzeko Vitoria – Gasteizko konpainia da. Javier Liñerari dagokionez, sortzaile garaikidea da. “Barro Rojo” bere aurreko lanarekin hainbat jaialditan aritu eta egile hasi berriaren Max Sarietarako hautagai izan zen. Ikus-entzuleek gaur arratsaldean, 20:00etatik aurrera gozatu ahal izango dute “Tendríamos que haber empezado de otra manera” lanaz, Pabellón 6 aretoan.

Igor & Moreno edo Igor Urzelai eta Moreno Solinas, dantza garaikidean aritzen diren bi artista gazte dira, bat euskalduna eta bestea korsikarra. Egoitza Londresen dute, baina dantzak eramaten dituen lekuan bizi dira, euren lanak Europan, Estatu Batuetan, Txilen eta Txinan aurkeztuz. Duela hiru urte ere BADen egon ziren Igor & Morenok hainbat saritarako izendapena jaso dute, Total Theatre Award eta National Dance Awards sarietarako, besteak beste, eta euren lanak nazioarte mailan aurkezten jarraitzen dute. Oraingo honetan “Andante”, euren azken lana, Estatuan aurkeztuko dute lehen aldiz, bihar, 20:00etan, Campos Antzokian. “Andante”, lasaitzeko, astiroago aritzeko, denboraren iragana eta gure arreta zelan doan hautemateko gonbidapena da. Elkarrekin igarotzen dugun unea da, batak besteari ezer esan behar barik. Dantzaren, soinuaren, argiaren eta lurrinen bitartez behe-lainoan zehar egingo dugun bidaia da.

BADeko 21. edizio honetako euskal proposamenen artean, sorkuntza eszenikoari laguntzeko BilbaoEszenako – Baliabide Eszenikoen Zentroko “Artistak Egoitzan” programan aukeratutako hiru proiekturen aurkezpena eta estreinaldia ere badaude. Horietako bat Gorka Pereiraren (Zirkozaurre) “Tiempo” da. Dantzaren eta zirku garaikidearen bitartez ikus-entzuleak bidaian eramango ditu, denboraren pertzepzio desberdinak sortuz; penduluaren mugimendutik abiatuta teknologia berrietan oinarritzen da, patroi berriak ikertuz eta horiekin dantza eginez. Zirkozaurrek “Tiempo” lanaren aurre-estreinaldia egingo du asteazkenean, urriaren 23an, 20:00etan, Pabellón 6 aretoan.

Datorren igandean, urriaren 27an, amaituko den BADen programazioaren barruan, beste euskal ekoizpen lan batzuk ere jasotzen dira, Ziomara Hormaetxeren, Benetan Beren eta Eguzki Zubia-La Dinamikaren eskutik. Ordutegiei, prezioei, sarrerak eskuratzeko moduari buruzko informazioa eta jaialdiaren egitarau osoa www.balbilbao.eus webgunean dago.

 

    OSTEGUNA, URRIAK 17

    Sin eventos

    OSTIRALA, URRIAK 18

    Sin eventos

    LARUNBATA, URRIAK 19

    Sin eventos

    IGANDEA, URRIAK 20

    Sin eventos

    ASTELEHENA, URRIAK 21

    No items found

    ASTEARTEA, URRIAK 22

    No items found

    ASTEAZKENA, URRIAK 23

    Sin eventos

    OSTEGUNA, URRIAK 24

    Sin eventos

    OSTIRALA, URRIAK 25

    No items found

    LARUNBATA, URRIAK 26

    Sin eventos

    IGANDEA, URRIAK 27

    Sin eventos

Copyright © 2021 BAD BILBAO

B.A.D Bilbao Antzerkia Dantza - Festival de Teatro actual y Danza Contemporánea de Bilbao