MEMORIA, Itziar Manero
Proiektu hau sortzen da MEMORIA zer den aditzeko gogotik. Memoria, bakoitzarena edo kolektiboa, biologikoa, historikoa, soziala.
Amama baten eta iloba baten arteko elkartzea da. Saio bat da, galderak egiteko, elkar ezagutzeko, agur esateko eta zaintzeko, amamaren memoria desagertu baino lehenago egin behar baita, memoria hori berarena izaki; ordea, bada belaunaldi oso baten memoria kolektiboaren zati bat ere. Eszena-lan honek gaztelaniazko eta euskarazko emankizunak izango ditu.
Itziar Manero-ri buruz
Itziar Manero zuzenbidean lizentziatua da eta Giza Eskubideen, Demokraziaren eta Globalizazioaren arloko Masterra du egina. Nave73 Eskolan dauzka eginak eszena-ikasketak, Madrilen. Gaur egunean, La Tristura konpainiarekin egiten du lan, Future Lavers izeneko antzezlanean, eta baita El Pont Flotant konpainiarekin ere, Acampada antzezlanean, nazioarteko birak eginez. Produkzio propioa izango du hau, bakarkakoa, eta La Tristura konpainia ezagunaren aholkularitza izango du hemen ere.
EL MEJOR DE LOS MUNDOS, Estudio Gheada
Eszena-proposamen teknologiko bat da, eta, beraren bidez, ikusiko dugu nola eraikitzen den ikus-entzunezko auto-erretratu bat zuzenean, protagonistak bizi izandako esperientzien arabera aldatzen den antzezpen bat. Oholtzaren gainean, elkarrizketa bat izango da antzezlearen eta teknologiaren artean, eta horrek lagunduko dio bere auto-erretratu hori eraikitzen, kanpoko publiko abstraktu eta urruneko batek kontsumi dezan, gure gailuen pantailen atzean ezkutaturik. Proiektua 2018an sortu zen, Eusko Jaurlaritzaren Kultura eta Hizkuntza Politikako Sailak babestutako ikus-entzunezko instalazio artistiko baten moduan, eta, orain, eszena arloko proposamen bat bilakatu da.
Estudio Gheada-ri buruz
GHEADA estudio artistiko bat da, Raquel Duránek eta Rut Brionesek eratua; igerian ibiliko dira ikus-entzunezko instalazioaren, bideo-artearen eta eszena-arteetarako proiekzioen diseinuaren ertzetan. Arian-arian, murgiltze-, performance- eta elkar eragite elementuak sartuko dituzte. Mugitzen den irudiaren hizkuntza darabilte gogoeta egiteko egungo mendebaldar gizartearen gainean. Bere lanaren xede nagusia da ikertzea zer zeregin duen banakoak kolektibitatearen barruan eta, orobat, binomio horretan ezinbestean sortzen diren sinergiak, paradoxak, trukeak eta inkongruentziak.
ROSES TO DANCE, María Andrés
ROSAS TO DANCE lanak ibilaldi historiko bat egin nahi du eszena-arloko hainbat lanetan zehar, zeintzuek, maisulanak izaki, dantza garaikidearen kultur ondarearen oinarriak ezarri baitzituzten. Denboraren trazu horri, gainera, umorea eta koreografia-hizkuntza erantsi nahi zaizkio, LaRutan konpainiak atzen urteetan hizkuntza propio moduan landu duen hori.
María Andrés-i buruz
María Andres Sanzek zuzentzen du LaRutan. Eusko Jaurlaritzak eta Bilboko Udalak sorkuntzarako zenbait laguntza eman izan dizkiote konpainia honi, eta, bestalde, Estatuan ere hainbat sari irabazi izan ditu, eta Estatuko nahiz nazioarteko hainbat feria eta jaialditara gonbidatu izan dute.
